الجمعة، 19 يونيو 2009

بكل بساطة ... مين فاز في النهاية ؟؟

أحيانا الصغار على برائتهم يصير لهم اهتمامات غريبة فعلا ... مثلا اخويا الصغير عمره 7 سنوات بس مهتم بأشياء غريبة فعلا على عمره ما شاء الله ..

مثلا قبل فترة كنت للتو داخل الى البيت بعد الصلاة وأسمع اصوات ضرب منتظمة فوق ( طاخ ... طاخ ) ... طلعت والا الاقي اخويا الصغير هذا ماسك شبشب حمام الله يكرمكم ونازل ضرب على شاشة التلفزيون .. خييييير ... انا ما استوعبت الموقف الا لما لقيت صورة جورج بوش يصرح في أحد المؤتمرات الصحفية !! الغريبة ان اخويا كان سابق منتصر الزيدي !!

اليوم .. كنت أذاكر أحياء وجا نفس أخويا الصغير بعد ما طفش من العاب النجاح ودخل الغرفة وانسدح السرير ... غمض عيونه وفتحها والتعب بادي عليه وقال : ( أبان ... مين فاز فلسطين ولا أمريكا ؟؟) ... حاولت امسك نفسي من الضحك واحاول اخلي نفسي جاد بأقصى درجة عشان يدخل جو ...
قلت : ( طيب ايش دخل امريكا ) ...
قال : ( الحرب اللي صارت !! ) ...
قلت : ( أجل قصدت اسرائيل ؟؟ )
فتح عيونه وقال : ( ايييييييوه ... اسرائيل ... مين فاز المسلمين ولا اسرائيل ؟؟ ) ..
انا تورطت ولا عرفت أجاوب .... حسيت انها صارت مباراة ... قلت : ( صار تعادل !!) .. (: .. وكملت : ( طيب انتا ايش تسوي عشان تساعدهم يفوزو ) ...
قال : ( كل يوم ارجع من المدرسة احط في الظرف ريال ) .. ضاع اجره مسكين !!
قلت : ( كويس ... بس ايش تساعدهم في شي ثاني !! بس تساعدهم بالفلوس !! )
قال : ( الفلوس اهم شي في العالم ) ..
قلت : ( صح ... بس ليش احنا عندنا فلوس كثيييير ولا فزنا !! )
سكت شويا ... بعدين ضحك وقال ما ادري ...
حقيقة حتى انا راعي السؤال ما عرفت اجاوب للأسف ..

هناك 5 تعليقات:

علي النعيم يقول...

بكل بساطة الجواب لأن الفلوس مهب كل شي

والسبب الثاني من قال أن الفلوس الي عندنا توصلهم .. كم نسبة الفلوس الي توصلهم من الفلوس الي عندنا ؟ وبعدين هل كل تجارنا يخرجون زكاتهم ؟

الحقيقة أهنيك على أسلوب الحوار مع اخوك .. وزين أن طفل بالعمر هذا تكون القضية هذي موجودة في باله ويتبرع بريال يوميا .. وممكن أيضا تعوده على الدعاء لهم .. في الصلاة إذا كان بدا يصلي أو في أي وقت

أشكرك على الموضوع

معاذ الخليفاوي يقول...

مرحبا أبان

والله هالسؤال دائما يخطر على بالي. مو مين فاز طبعا!
الفلوس مو هي اللي تجيب النصر، ابدا. العلم هو مفتاح النصر.
اللي يعرف أكثر يكون له نصيب أكبر من ل شيء واللي يعرف أقل يكون نصيبه أقل واللي ما يعرف شي - احنا طبعا - ماله شي مهما كان معه من فلوس. فلوسه ممكن تجيب له اشياء هم يعرفوها بس صعب الفلوس تجيب اشياء محد يعرفها الا اذا تم استغلالها صح. واذا تبغى تتكلم عن استغلال الفلوس في العالم العربي فتصبح على خير!

معاذ الخليفاوي يقول...

نسيت، قول لأخوك أحلام سعيدة، يمكن احد من ربعنا يفوز فيها!

نفر يقول...

أهنئ أخوك على الإهتمامات ما شاء الله

هل كنا وحنا في عمرهم مثل هالتفكير ؟؟

أتوقع تقدم كويس في الأجيال ... أما من ناحية مين فاز ؟

تونا ماخلصنا "لعب"

أبان باهبري يقول...

أهلا بيك علي ..
اكيد صح الفلوس مهي كل شي وهذي الرسالة اللي مفروض وصلتها لأخويا (عندنا فلوس وماصار شي !!) ... يعني احنا عندنا "دول الخليج خاصة" امكانات كبيرة مالية وبترولية بس ما استخدمناها وما تدري هل تكون موجودة بعد 200 سنة مثلا بنفس الكمية !!

اهلا معاذ ..
منور يا سيدي وشرفت ( :
تعجبني يا فيلسوف ... صادق هذا هوا قصدي احنا عندنا فلوس بس قاعدين نكبها !!

عبدالمحسن ..
من جد ما شا الله اهتمامات حلوة ما كانت عندي انا وانتا بس انشا الله تفيد !! بس مرة رهييب لما تسمع هذا الكلام من واحد صغييير !!