الجمعة، 11 ديسمبر 2009

حقوق النسخ ..

كعادتنا اذا كان عندنا غداء عند عمي نؤقت الخروج من البيت على التوقيت اللي نسمع فيه " الحياة كلمة " في الطريق .. واحد سأل الشيخ سلمان عن البرامج المنسوخة اللي نلاقيها ببلاش في الانترنت وان الواحد لو يبغى يشتريها فهي جدا غالية ( يعني قمة الاغراء انك تلاقي اللي بالف وشويا ببلاش .. لا وبكبسة زر بس!!) ..

قلت لأخويا انهم "حراميا" !! المهم اخويا شبه ثار عليا يقول الناس تقول هذول يسرقونا وان البرنامج ما يكلفهم الا مصمم برامج !! وقعد يسردلي التكاليف اللي ممكن تكلفهم .. وكان مدرس اخويا يقولهم الامريكان يضحكو علينا يبيعو السيارة اللي ما تكلفهم 30 الف ب100 الف علينا !! قال اخويا طيب كيف فلست جنرال موتر اجل !!

بعيدا عن تهمة النصب لهذي الشركات كنت أتساءل ان الشركات منزلة البرامج بهذي الاسعار مو لعامة الناس يعني من الممكن ان الشركة ما تهتم كثير بإن مجموعة من المستخدمين الصغار يستخدمو برامجها المنسوخة !! طيب لماذا هذي الشركات ما تنزل نسخ للشركات ونسخ للعامة تكون مخفضة ؟؟ لسبب بسيط .. يقولي اخويا ان مرة راح يشتري برنامج للشركة وقال للموظف اعطيني وندوز نسخة "البزنس" .. قال في الموظف في نسخة "الهوم" ارخصلك !! قال اخويا عارف بس انا شركة وابغا انتاج بزنس ! قال الموظف لا ليش في عندك الانتاج الثاني ارخص كثير ونفس الميزات تقريبا حتى لو انتا راعي شركة !!

كذا صار مافي داعي للأنتاج المخصص "للبزنس" لانه الموظف يتهمك بالغباء لو طلبته حتى ولو انت شركة كبرى ويهمك انك تكون نظاميا وماشي صح براحة ضمير !

انا هاوي فوتوشوب مثلا استخدمه مرة في الشهر هل تسوى اني اشتري البرنامج اللي بمبلغ وقدره وانا طالب على قد حالي !! -قد- لا أؤثر على الشركة كثيرا لو استخدم امثالي البرامج المنسوخة ولكن الضمير قد لايسمح للبعض بهذا الفعل !!

في بعض الدول تخدم الشركات هذه الشرائح بطريقة التوزيع المقنن .. مثلا في كندا توفر الجامعات لطلابها البرامج الاصلية بأسعار مخفضة .. قد تساعدنا الجامعات والمدارس عندنا بأن نحترم حقوق النسخ اذا سهلت بتوزيع البرامج الاصلية لطلابها وللهواة بأسعار رمزية بالتعاون مع الشركة المنتجة للبرنامج ... وهذ ايضا في مصلحة الشركة لانها ستصل الى شريحة اكبر كانت ستتجه للمنسوخ ..