الأحد، 27 يونيو 2010

ليش طارت المخططات !!


ساعات قليلة تبدأ قبل دخولك اخر اختبار في السنة وتنتهي بالخروج منه : شيء غير طبيعي يحدث فيها ..لا اجد اي دافع للبداية في الخطط والخيالات التي كانت تصارعني اثناء المذاكرة في الاسبوعين الماضيين والتي كنت احس ان العالم كله لايسوى شيء بدونها !!


المشاريع اللي كنت مأجلها طوال السنة بعذر الدراسة .. الخطط الرهيبة التي رسمتها بأحكام .. لم ابدأ بها الى الان بعد مضي اسبوع من الاجازة .. لماذا ؟؟

المتهم الاول عندي هو اللخبطة ..

فلا ادري متى الترم الصيفي يبدأ !! ولا ادري وين الوظيفة اللي كنت اخطط لها !!

لخبطة العالم اللي حولي .. ناس رايحة .. ناس جاية .. واحد داخل واحد طالع .. احس ان متابعة هذي التحركات تخربط اي استقرار من الممكن ان احصل عليه .. اكاد اجزم ان العشوائية معدية .. مجرد متابعات بسيطة لنشاطات من حولك تكون معرض للاصابة بهذا الفيروس !


المشكلة الثانية النوم يجر بعضه والراحة تجيب اختها ! لو ما تقوم الصباح وفي "راصك" مخطط ايش حتنجز اليوم بالكاد حتسوي شغلتين وفجأة تجد اليوم خلص ! ومع كم يوم الاجازة خلصت !


هل في حل سريع وسهل لهذي الحوسة ؟؟

اتوقع انه الضغط .. الوسيلة الانجح لانجاز المشاريع .. انك تحس ان في حاجة وراك تجبرك انك تمضي في الخطة وتواصل في العمل ..

حاول توجد ضغط على نفسك يخليك -غصبا عنك- تمشي على الخطة .. يمكن يكون في افكار كثيرة كيف تسوي ضغط على نفسك لكني اتوقع انجح طريقة واسهلها انك تشرك مجموعة معاك تحمسك في كل مشروع من مشاريعك .. مجموعة يتابعوك مو تتابعهم !!



هناك 5 تعليقات:

عبدالرحمن يقول...

هلا أبان : )
فعلا كلامك صحيح الواحد يروح عليه الوقت وهو ما سوّا شي مع إنه مخطط ومجهز : )

نصحية دائم تردد وأثبتت نجاحها :
إذا أردت أن تعمل عملا فاعمله
!!!
كيف يعني ؟

يعني إنك إبدأ الآن وأنجز أول خطوة من العمل ، لا تسوف ، ابدأ وستنجذب للعمل لكن أهم شي إبدأ : )

مثال في كتاب أبي أبدا أقراه وكنت أسوف وأأجل ، بديت فيه أمس وخلاااااااص ناوي ما أوقف إلا بنهايته : )


شكرا ليك على كلامك الحلو : )

mtlinjawi يقول...

يا بمبم صراحة عن نفسي حطيت لي جدول قراءة مكثف و ماشي عليه ، و ثاني شي بتجنب السهر ، يعني من اسبوع بنام قبل ١١ و بصحى على الفجر و الحمد لله ، و اكتشفت انه الصحيان وقت الفجر و عدم النوم بعده يعطيك يوميا ٣ الى ٤ ساعات من الخلوة المثمرة بالقراءة !!!

أبان باهبري يقول...

عبدالرحمن .. صادق جربت هذي الطريقة اني اغصب نفسي في البداية ابدأ بالشي ... بس برضو بعد فترة تمل شويا .. يمكن مضيع الحافز او الضغط اللي اقول عليه .. كل يوم اقول بكرة ابدأ فيه ( ماعدا القراءة لان مالها خطة معينة !)!!

ماجد ماشا الله عليك صعبة جدا اقاوم الاغراء وانام بدري في الاجازة ( مع اني ما انام متأخر كثير) .. بس برضوا عندي مشكلة النوم زاااايد يمكن عشان الجو !! يعني كل يوم انام 8 ساعات ( مع اني متعود انام 6) ومع كذا اكون تعبان العصر وانام احيانا العصر !! القراءة البرنامج الوحيد اللي مستمر عليه وساحب على باقي الاشياء .. كويس ماجد شكلك حتتطور كثير على كذا في هذي الاجازة ( :

شكرا ياجيدين

رصف يقول...

السلام عليكم ,,

والله يا أبان معاك حق ..
كلنا ذاك الرجل ,,

بس أنا أشوف إنك قبل لا تنام الليل - قبل لا تبدأ يومك .. ترتب أولويات الحاجات, وتشوف إيش الحاجات اللي المفروض تسويها بكرة.

اكتبها في ورقة .. وبعدين - إذا كنت فاضي في اليوم التاني - ح تقوم وانتا في راسك تسوي المهام دي في وقت معين.

إذا خلصت من مهمة شخمط عليها .. وألغيها ..

الطريقة دي مجربة .. تفيدك فترة معينة .. بس ح تضطر تدور على طريقة تانية

D:

أيمن النقيب

إياد يقول...

والله مشكلة يعاني منها الجميع.. :)

أنا أرى أفضل حل هو وضع (التزام) بحيث "يجب" إنك تلتزم في تنفيذه..
ووضع الالتزام يكون عن طريق وضع "أهداف الإجازة" ،، نهاية الإجازة راحت أكون حققت أيش؟
بعد ذلك.. يكون لكل أسبوع أهدافه.. "أهداف يومية ثقيلة، وأهداف شهرية بعيدة" .. وأنت بكيفك.. رتب الأسبوع مثل ما تبي.. المهم إن نهاية الأسبوع.. واحد واُثنين وثلاثة يكون مُنجز...
بالطريقة هذي.. تشعر بالمسؤولية إلي تشجعك للالتزام وتحقيق هدفك..

وطبعاً لما يكون الالتزام مع جماعة.. بس أكثر جدوى .. :):)